Ватиканда 133 нафар кардинал Рим папаси Францискнинг вафотидан сўнг черковнинг 267-папасини сайлаш учун конклавда йиғилди. Ватиканнинг махфий деворлари орасида 800 йилдан ортиқ давом этиб келаётган маросим билан ўтказилган сайловларнинг биринчи тури натижа бермади. Янги папа сайланмаганидан сўнг Сикстин капелласининг мўрисидан қора тутун кўтарилди.
Католикларнинг сўнгги руҳоний етакчиси ва Ватикан давлати раҳбари Рим папаси Франциск 21 апрелда вафот этганидан сўнг бутун дунё бўйлаб 1,4 миллиард тарафдори бўлган Католик черковининг 267-папасини аниқлаш учун бугун биринчи тур овоз бериш ўтказилди. Христиан диний садолари остида Сикстин капелласига кирган 133 нафар сайловчи кардинал бирма-бир қасам ичди. Сўнгра лотин тилида «Extra Omnes», яъни «иши бўлмаганлар чиқсин» маъносидаги буйруқ берилди ва капелла ичида фақат сайловчи кардиналлар қолди.
Католик черковида руҳонийлар табақасида пападан кейинги энг юқори даражадаги дин пешвоси бўлган кардиналлардан 80 ёшдан кичик 133 нафари иштирок этган овоз бериш натижаси Сикстин капелласининг мўрисидан кўтарилган тутун билан эълон қилинди.
Папа сайлангунга қадар кунига 4 та овоз бериш бўлади
Мўридан кўтарилган қора тутун билан бугун бошланган Конклавнинг биринчи мажлисида янги папа сайланмагани дунёга эълон қилинди. 133 нафар кардинал эртадан бошлаб папа сайлангунга қадар эрталаб ва тушдан кейин иккитадан бўлиб кунига 4 та овоз бериш ўтказади. Янги папа сайланган тақдирда Сикстин капелласининг мўрисидан оқ тутун кўтарилади.
Кўплаб номзодлар курашади
Папалик учун кўзга кўринган номзодлар орасида италиялик кардинал Пьетро Паролин, венгриялик кардинал Петер Эрдо, америкалик кардинал Раймонд Лео Берк, италиялик кардинал Маттео Мария Зуппи, филиппинлик кардинал Луис Антонио Гоким Тагле, италиялик кардинал Пьербаттиста Пиццабалла, ганалик кардинал Петер Турксон, франциялик кардинал Жан Марк Авелин, швециялик кардинал Андерс Арборелиус, гвинеялик кардинал Роберт Сара, мальталик кардинал Марио Грек, Конго Демократик Республикасидан кардинал Фридолин Амбонго Бесунгу, АҚШдан кардинал Тимоти Долан ва кардинал Роберт Фрэнсис Превостнинг исмлари тилга олинмоқда.
Кардиналларга мурожаат
Конклав олдидан базиликада ўтказилган маросимни бошқарган кардинал Жованни Баттиста Ре кардиналларга «қийин ва мураккаб» даврда Католик черковига раҳбарлик қила оладиган етакчини сайлашга чақирди. Кардинал Ре: «Бу черков бирлигини сақлашга қаратилган кучли чақириқдир. Бу бирлик бир хилликни англатмайди, балки хилма-хиллик ичида мустаҳкам ва чуқур бирликни англатади», деди.
Ташқи дунё билан алоқа узилди
Ре овоз беришнинг «ғайриоддий аҳамиятга эга» эканлигини ва кардиналлар ҳар қандай шахсий фикрни четга суришлари кераклигини таъкидлади.
Қолаверса, Конклав иштирокчиларининг ташқи дунё билан алоқа қилишига тўсқинлик қилиш мақсадида Ватикан ҳудуди ичида мобил алоқа сигналлари ўчирилди.
Папани аниқлаш мақсадида диний садолар остида биринчи мажлис учун Сикстина капелласига кирадиган 133 нафар сайловчи кардинал Инжилга қўл қўйиб ҳеч қандай тафсилотларни ошкор қилмасликлари ҳақида қасам ичадилар.
Таълим вазирлигининг янги лойиҳаси
Миллий таълим вазирлиги (МТВ) 4 йиллик мажбурий лицей таълимига муқобил равишда «3+1», «2+2» ва «ёшга асосланган таълим» каби 3 та янги модель устида ишламоқда. Янги моделлар билан лицейнинг сўнгги курси университетга тайёрлов йили бўлиши, 10-синфдан кейин битириш ёки ёшга боғлиқ мослашувчанлик каби вариантлар кўриб чиқилмоқда.
Абу Муслим тайёрлади
